Шибанов
Виктор
ЭТНОФУТУРИЗМ
НО
ТУАЛА
УДМУРТ
ЛИТЕРАТУРА
Куддыръя,
асьме этнофутуризмлэсь портэм
удысъёсын азинскемзэ но портэм
удысъёсъя ог-огеныз герзетъёссэ
син азям пуктыса, аслым портэм
юанъёс сётъясько. Кылсярысь,
кызьы меда суредасалзы туала
художникъёс Олег Четкаревлэсь «Чагыр
но дыдык» повестезлэсь пумзэ,
куке Конди кар юртъерлэн липет
йылаз потэ но, дыдыклы укшаса, ас
омырвотаз лобыны турттэ (оло нош
ошиське)? Кылсярысь, Кучыран Юри,
Валентин Белых, Гиргорей Слави?
Кыче крезьгур чузъяськысал отын,
та ужъя спектакль пуктэмын
луысал ке? Кыче сьор катанчи
тужгес но тупасал та учырлы? Яке
Лидия Нянькиналэн «Ау-ау, яке
инбамысь гожъёс» повестезъя.
Кыче суред мургес шараясал таиз
текстлэсь пумзэ, куке нылмурт
понна инсьорысь олокыче но
геометрической пусъёс
адзиськемъясько? Кызьы шудысал
со финалэз Ольга Александрова?
Кыче жожгур гожтысал солы Иван
Григорьевых? Яке, шуом, кызьы
поттысалзы сцена вылэ «Обыда»
пьесазэс Петр Захаров но Василий
Ушаков, кытын геройёс куддыръя
адямилэн йыркобы пушказ уло но
оти бергало-поръяло? Но трос
мукет сычегес юанъёс.
Этнофутуризмез
овол сурано фольклорен. Берло
дыре сыче малпан чузъяськыны
кутскиз (Ф. Ермаков),
этнофутуризм 1990-ти аръёсы оз
кылды, пе, трослы вазьгес –
Кузебай Гердлэн, Ашальчи Окилэн,
Михаил Петровлэн, Флор
Васильевлэн ужъёсазы. Нош чапак
Олег Четкарев выллем
авторъёслэн текстъёсазы солы
пум вуиз. Татын пусйыны кулэ,
этнофутуризм (туала пуштросэн
эскероно ке) огшоры фольклор
гинэ овол, со – дунне вылысь
постмодернизмен аспортэмлыко
эчешон. Мукет сямен вераса,
фольклорез выжытыны кулэ
постмодернизмлэн инъет вылаз.
Фольклор постмодернизмен
кузпалъяськыны кулэ, соку
соослэн вордскоз пиналзы –
этнофутуризм. Зэм, куд-ог
учыръёсы сюантэк но нылпиоссы
вордскыны быгатозы, дыр. Но со
понна пичи нуныез тышканы уг яра,
тышкано мукетъёссэ...
Кызьы
нимано со выль югдурез, кудиз
кылдиз асьмелэн но Удмурт
шаерамы 1990-ти аръёслэн
кутсконазы? Татын
котькин быгатэ вал аслэсьтыз
выль нимкылзэ-терминзэ дэмланы (угось
социализмо реализм татын чылкак
кужымтэм но пайдатэм луиз), но
выль мифлэн пуштросэз соин сэрен
ой воштиськысал. Зуч культураын
но выльдиськон бере кылдылиз
сыче споръяськон югдур. Кызьы
нимано соцреализм бере лыктись
мукет лулчеберетэз? Кудиз шуиз
метаметафоризм, мукетыз -
метаболизм, куиньметиез нимаз
концептуализм, ньылетиез -
постсоцреализм, витетиез -
авангард но трос мукет. Но дыр
возьматиз: котькызьы нима,
пуштросэз – одиг. Постмодернизм.
Туала удмурт культураын но сыче
ик постмодернизмо югдур кылдиз.
Озьыен,
мар со сыче постмодернизм ? Ку со
кылдиз но малы ? Овол-а солэн кыче
ке кышкыт кужымез, кудиз
удмуртлыкмес, ментальностьмес
быдтыны быгатоз? Таче но трос
мукет юанъёс
кылдо та «постмодернизм»
валатонэз нырысьсэ кылиськод ке.
Постмодернизм
- со туала Европае 1960-ти аръёслэн
пумаз волмыны кутскем
дунневалан (мировосприятие),
кудиз пумен вормиз культураысь
мукет тулкымъёсты но азьпал радэ
потыса, туннэозь
егитъёслэн визьбуренызы
кузёяське. Постмодернизмлэн
визьбурчиосыз-идеологъёсыз луо
структурализмысь но
структурализм пыр будэм
тодосчиос. Та ласянь выль кыл
верась луиз Франция, угось
ваньмыз сямен бадзым нимъёс та
шаерен герзаськемын: Ролан Барт,
Жак Деррида, Мишель Фуко, Юлия
Кристева, Жан-Франсуа Лиотар,
Жиль Делез, Феликс Гваттари, Жак
Лакан.
Постмодернизм
пуштросэзъя но идеологиезъя
мечак герзаськемын Западысь
культураен, «мукет»
менталитетэн. Зэмзэ но, сое
малпаськытэк выжытид ке туала
удмурт культурае, со быгатоз
асьмелы трос «секыт висёнъёс»
вайыны. Озьыгес медаз луы шуыса,
Эстониысь но Финляндиысь (Кари
Салламаа) культурологъёс
вераськон жутизы
постмодернизмлэн сыче
тулкымез сярысь, кудиз
пуштросэзъя ожыт лыдъем, «пичи»
нациослэн лулчеберетсылы
тупалоз. Нимамын вал со «этнофутуризм»
шуыса. Та пумысен пусйымон луэ
Хельсинкиын потись «Синтез»
журналлэн этнофутуризмлы сизем
нимысьтыз номерез (1994, № 4) но
отысь Пярл-Лёхмус, Юлле Каукси,
Андрес Хейнапуу, Свен
Кивисилдник эстонецъеслэн чошен
гожтэм манифестсы. Этнофутуризм
ужпумлы нимысьтыз сиземын вал
асьмелэн но «Инвожо»
журналмылэн 1994-ти арын потэм
номерез (№ 9), кудиз бордын трос
кужымзэ сётыса тыршиз Петр
Захаров. Озьы П. Захаров асьме
литератураын луиз нырысети
этнофутурист, кудиз таче
нимбурзэ аслаз синмаськымон
гожъямъёсыныз но юнматиз. Асьме
дорын гинэ овол, Финляндиын но
(1994-ти арын «Эбга» трагедиеныз).
Этнофутуризм нимкыл вакчияк
таче пуштросэз возьматэ: мар
карыны кулэ СССР-лэн
бервылысьтыз пичи лыдъем нациос,
чуказе нуналэ (соин ик: «футуризм»)
культуразылэн аспортэмлыкез,
чеберез, воштонтэм кужымез (соин
ик «этно») медаз быры шуыса.
Мукет сямен вераса, «пичи»
нациос конкуренцилы
чидась луон понна уже куто
постмодернизмез, но сое ас
калыксылэн, ментальностьсылэн
куронъёссылы матын каро.
Этнофутуризм тужгес но кулэ луэ,
дыр, карын улись егит удмуртъёс
понна.
Кычеесь-о
валтись тодметъёсыз та выль
тулкымлэн - постмодернизмлэн,
кудиз удмурт литературалэсь но
тусбуйзэ воштытиз? Угось «кыкети
бурд» сярысь - этносмы,
менталитетмы сярысь - асьмеос
трос гинэ кылэмын но лыдземын
ини. Тырмыт гожъмын та сярысь,
кылсярысь, Михаил Федотовлэсь «Вось»
книгазэ эскеремен валче, отысь
вашкала удмуртъёслэсь
осконъёссэс туала адямилэн
дуннешодонъёсыныз герзамен
валче. Но вашкала мифъёсмес гинэ
тодон лыдзисьёсты но
тодосчиосты буйгатыны кулэ овол,
мифъёс угось постмодернизмлэн
инъет вылаз асьсэды мукет
сяменгес возьыны кутско вылэм,
огдышем соцреализммылэн луд
вылъёсыныз чошатоно ке.
Озьыен,
кычеесь-о со постмодернизмо
тодметъёс? Та сярысь мон трос пол
гожъялляй ни ке но, выльысь тодэ
вайыто на. Нырысетиез, туала
дунне - со йырчукин кымаськем
маке, йырчукинлык,
абсурд. Азьло дуннеенымы
чошатыса, таиз дунне йырин-чукин
кымаськиз кадь. Лулчеберетын но
литератураын гинэ овол - котыр но
котьмар ласянь.
Йыринчукинлыклэсь, абсурдлэсь
философизэ ас вакытаз мур
усьтыны быгатиз Нобель премилэн
лауреатэз Альбер Камю «Миф о
Сизифе. Эссе об Абсурде» нимо
тодмо ужаз. А. Камю валэктиз:
туала адями Вашкала Грециысь
Аидэ сюрем Сизифлы котыр ласянь
тупа, пе. Со жутэ гурезь бамалэ
бадзым изэз; жутыса гинэ вуэ
- из берен берлань питыра.
Батырлы нош ик уллань васьконо
но нош ик уж борды кутсконо луэ.
Нош ик вань кужымзэ поныса, вань
быгытъёссэ золтыса тубытэ Сизиф
изэз гурезь бамалэ. Со тодэ: из
нош но нош уллань питыралоз
шуыса, озьы ке но - тубытэ... Сыче
ик овол шат асьмелэн быдэсак
улонмы ? - юа француз философ,
дуннемылэсь йыринчукинлыксэ
валэктыса. Удмурт литератураын
таче малпаськытись,
йыринчукинлыкез возьматись
чуръёс, мон сямен, тужгес но
золшараясько Никвлад
Самсоновлэн «Адзон» повестяз,
Петр Захаровлэн кылбур чуръёсаз.
Постмодернизмлэн
кыкети висъямон тодметэз - интертекст
(куддыръя «полистилистика» шуо:
трос стильеслэн сураськыса
огинын мынэмзы, оргхимияысь «полимеръёс»
валатонлы матэяса). Оглом
полистилистика герзаськемын М.
Бахтинлэн «диалогизм» нимо
валатонэныз. Но сое, выль пуштрос
сетыса, Европае волмытиз Юлия
Кристева. Интертекст - со одиг
текст пушкы портэм-портэм трос
текстъёслэн огазеяськемзы.
Кылсярысь, кыче ке чеберлыко
произведениын табере артэ
сылыны быгатозы олокыче но
формулаос, таблицаос, портэм
философъёслэн гожъямъёссы,
уката ик «туалаосызлэн» (Фрейд,
Юнг, Ницше, Фромм но мукет).
Герой огвакытэ оскыны
быгатоз Христослы но, Буддалы но,
нош ас пуштросэзъя язычник
луэменыз данъяськоз.
Тодосчиослэн
возьматэмзыя, али котькуд
адямилэн огшоры вераськонэз но
тупа, пе, ини интертекстлы.
Интертекст ласянь тужгес но син
шоры йотымон луэ Сергей Матвеев
– «Шузи» романэныз но «Ъ (Чурыт
пус)» кылбур книгаеныз, со бере,
мон сямен, В. Ар-Серги.
Куинетиез
тодмет - текстъёсысь геройлэн но
аслаз текстэз кылдытисьлэн
йоспортэм, мыдрон луэмзы. Соос
кыче ке но шузи-мази муртъёслы
укшало, туж данъясько асьсэлэн
аспортэмлыко луэменызы, дуннеез
«сориськем синучконэз» сямен
адземзылы. Сыче тодметэз
Германиын ужась зуч тодосчи И.
Смирнов «шизонарцисс
психотип» шуыса нимаз
Шизонарциссизмлэн
симптомъёсыз - котьконя солэсь
пегзы - кемалась ини туала адями
пушкы пычамын, психоаналитикъёс
Ж.Делез но Ф.Гваттари возьматизы.
Озьы
вуж малпаськон интые кылдэ но
сяськая выль малпаськон ор -
постмодернизмо логика. Табере
дуннеын ог-огенызы герзаськыны
быгато – постмодернизм ирония
амалэн – азьвыл герзаськисьтэм
кусыпъёс, тодметъёс но
пуштросъёс.
Та
куинь тодметъёс возы ватсаны
луысал на трос мукетъёссэ; яке
котькудзэ тае ассэ куиньлы-ньыльлы
езнаны - но соиз ини мукет ужпум.
Вань-а
постмодернизмлэн инъетъёсыз
Удмурт шаерын? Куддыръя кунгож
сьорын улисьёс гинэ тазьы уг
юало, асьме элькунысь адямиос но.
Бен, кунгожсьорчиослы Удмурт
шаермы сярысь зэмлыкез
вераськод ке, соос тросэз паймо:
кызьы сыче пичи шаере-улосвылэ
тэрыны быгато сокем шимес
вачепумитъёс (противоречиос). Со
сярысь, шодске, нырысь ик
американецъёс веразы, кудъёсыз
вуизы вал Воткинске шор езо
ракетаосты «кынтон» пумысен.
Огласянь - ВПК-ысь паймымон выль
удысъёс, кычеоссэ дуннеысь
азьмынись технологиос но уг тодо,
нош мукет ласянь - гужем куазен
но ортчыны луонтэм дэриё урамъёс.
Огласянь - бадзым «Ижмаш», быдэс
дуннелы тодмо Калашников, но
мукет ласянь - адямиослы улыны
ярантэмесь общагаос - огъя
коркаос; одиг ласянь - быдзым
крезьгурчи П.Чайковский, нош
мукет ласянь - вашкала удмурт
кырзанъёс, кудъёсыз кемала (вашкала)
финн-угор вакытъёслэсь лулзэс
возе на. Пичи гинэ сэреге
огазеяськемын но сураськемын
финн-угор, славян но тюрк выжыос,
кудъёсыз вискыти та шаерын гож
ортчытыны табере шуглэсь но шуг.
Татын ик Запад но Восток, бур но
паллян, шузи визьмолык
но визьмо шузилык. Озьыен,
удмурт шаерысь адями - кунмурт,
кин зэмзэ но дорзэ яратэ ке, сое
сюлэмаз быдэсак пычатыны тырше
ке, ас пушказ пычатыны кулэ
ваньзэ та ваче пумит луись
оппозициосты,
йыринчукинлыкъёсты но. Озьы
паймымон суро-пожо Удмурт шаер «выльдиськон»
ортчем бере азьпал радэ поттэ
суро-пожо малпаськись адямиез.
Озьы культураын, искусствоын
шуак кылдо аспортэм геройес,
текстъёс.
Постмодернизм сярысь нимысьтыз
чакласькытэк, Удмуртиысь
лулчеберет ачиз кутске
кылдытыны сое.
«
back
