ЗИЧЫ (Vulpes vulpes ; зуч сямен лисица), лулосъёслэн сьось лёгетысьтызы кион динь выжыысь йол нонись пойшур. Мугорызлэн кузьдалаез 90 см-озь, быжызлэн - 60 см-озь. Гон буёлэз чужалэс-гордысен (жуась З.) сьод-куренёзь (сьод-курень З.), азвесь тусъем сьод (азвесьпыръем сьод З.). Пумиське Евразиын но Уйпал Америкаын. Удмурт элькунын чемгес улэ чошкыт кыр интыосын. Нюр интыосын но бадзым тэльёсын улыны уг яраты. Чемысь сие шыр выллем йырйись выжыысь лулосъёсты, лудкечъёсты, тылобурдоосты, муз вылэ каръяськись тылобурдоослэсь пузъёссэс. 3 – 13 зичыпиез вордске. Пойшуран онерын кулэлыкезъя нырысети интыосын сылэ. Чебер буёлооссэ пойшурвордонын кулэ каро. Быгатэ изъян вайыны пойшуран возёслы но тылобурдовордонлы. Огпалмон (бешенство) висёнэз волдыны быгатэ. Йырйиськись лулосъёсты ожытгес кельтыса, пайда вае. Удмурт калык кылосын но мифдуннеын З. шодскымон инты басьтэ, кескич урод адямиез возьматэ.