ВУКОМАК (Ondatra zibethicus ; зуч сямен ондатра), лулосъёслэн йырйись лёгетысьтызы комак динь выжыысь йол нонись пойшур. Мугорызлэн кузьдалаез 36 см-озь, секталаез 1,5 кг-озь. Быжыз кузь, мугорызлэсь 80%-сэ басьтэ, урдэсъёстиз пачкес, векчи семо, вакчи гоно. Тыбырыз одиг портэм буёло, югыт-куреньысен сьодозь. Вордиськем интыез – Уйпал Америкалэн уйпал но шор люкетъёсыз. Удмурт Элькунэ ваемын 1945 арын. Али пумиське вань ёросъёсын. Улэ вуын но музъем вылын; шур ярдуръёсы лэсьтэм гу каръёсын. Гу пасез ву пушкын. Гу кар лэсьтыны уг ке луы, ву будосъёслэн выжыоссылэс, модосъёссылэсь, сумедэн юнматыса, корка кар лэсьтэ. Гужем куспын кык пол быдэн 4 – 7-ен пи вордэ. Чемгес сие ву но вудур будосъёсты; будосъёс тырмонтэм дыръя, озьы ик сие куалялюльыосты, кисло-куслоосты, векчи чорыгъёсты, эбекъёсты. Пойшуран онерын дуно куэз понна нырысети интыосын сылэ. Быгатэ волдытыны туляремия но лептоспироз висён лопкытисьёсты.