Помидор

(Lucopersicon, њуч - томат), паслён семействоысь турын будос, тропикъёсын 3 пумо луэ. Али котькытын будэто. Огшоры помидор одћг аръем будос. Европае Колумб ваем. Нырысь чеберман понна будэтћзы, собере сиёнлы. Россиын будэто 200 арлэсь кема. Нырысь сое сьќд зарезь котырын гинэ будэтћзы, бќрысь вќлмиз ваньмаз сямен интыосы. Удм. шаерын бакча будос луиз 30-тћ аръёсы кылем дауре гинэ. Будэто сое шара убоосын но, теплицаосын но, производственной муген бадњымесь теплицаосын будэто но трос гинэ емышсэ басьто. Со емышъёс чеcкыт но пайдалыко луо. Отын вань углеводъёсыз, органической чырсъёсыз но минеральной сылалъёсыз. Али тодмо ини ог 2 сюрс сорт. Нечерноземъеын но Удм. шаерын будэто вазь вуись сортъёс - Грунтовой Грибовской 1180, Алпатьев 905 а, Перемога 165, Тќдьы налив 241,Талалихин 186, Сибирской вазь вуись, Москвич, Данна но мук. Берло аръёсы паськыт вќлмизы огдыре вуись сортъёс – Ермак, Ракета, Вазь вуись Аврора. Теплицаосын нимысьтыз будэто Белый налив 241, гибридъёс Ласточка, Карлсон. Бакча возисьёс асэнызы умоятэм сортъёсты будэто - Гигант, Бычье сердце, Хурма. Висёнъёсыз: бактериальной рак, бусћр виштыос, фитофтора. Изъянтћсьёсыз: ез нумыр, калялюльы, тќдьбурдоос, картош пыџ.
Лит.: Туганаев В. В., Баранова О. Г. Зеленые спутники человека. Ижевск, 1993.