ПИМЕНОВ Владимир Владимирович (в. 24.9.1930, Воронеж г.), Россиысь этнограф, ист. наукаосъя д-р (1978), проф. (1986), УАССР-ысь наукаосъя дано ужась (1990). М.В. Ломоносов нимо МГУ-лэсь ист. ф-тетсэ пырпотыса (1954), Карелилэн шаертодонъя музеяз наукая ужась луыса тыршиз, 1965 арысен СССР-ысь Наукаосъя академилэн этнографияя институтаз наукая покчи, бадзым ужась, 1981 арысен Прибалтика, Поволжье но Уйпал Европая ёзэн кивалтиз. 1985 арысен МГУ-ын этнографияя кафедраен кивалтись. Ужъёсыз карелъёслэн, вепсъёслэн, удмуртъёслэн этнографизыя. 1968 арын удмуртъёсты эскеронзэ статистикалэн куронъёсызъя радъяз но та методикаез этнографие мургес пычатыны чектиз. 1970–80 аръёсы со методикая Удмуртиын, Башкириын, Мордовиын, Мари, Чуваш, Калмык элькунъёсын трос муртъёслэсь юалляськыса эскеронъёс ортчытэмын. Кубаын этнографияя экспедицие пыриськиз, Наукаосъя академиязы ужасьёслы, Ханойысь, Берлинысь унивеситетъёсын лекциос лыдзиз. 1964 арын Москваын ортчем антропологъёслэн но этнографъёслэн (МКАЭН), 1985 арын Сыктывкарын финно-угроведъёслэн калык куспо конгрессъёсазы пыриськиз.

Ужъёсыз .: Удмурты: Этносоциологические очерки. Ижевск, 1976. (Чошен); Удмурты: Опыт компонентного анализа этноса. Л., 1977; Количественные методы в этнографии: Из опыта работы в Удмуртии//Этнокультурные процессы в Удмуртии. Ижевск, 1978; Краткая статистико-этнографическая характеристика удмуртов //Сельские поселения в Удмуртии в ХIХ—ХХ вв. Ижевск, 1981. Л.С. Христолюбова.