Музейёс

Элькунамы трос отрасльёсын музейёслэн вотэссы (сетьсы) кылдэмын: шаертодон, тодэ ваён (мемориальной), художественной, литературной, исторической но мукет. 1997-тћ арын 1-тћ толшор азелы Удмурт Элькунын 21 музей лыдъяське вал, соос пќлысь 12-ез – филиалъёс но музей люкетъёс. Интыысь улосвылысь нырысетћез Земской музей 1909-тћ арын Сарапул карын усьтэмын вал (учконо Шор Прикамьелэн историезъя но лулчеберетэзъя музей нимо статьяез). 1920-тћ арын Ижевскын интыысь улосвыллэн историезъя музей усьтэмын вал (али Удмурт Элькунысь Йќскалык музей). Глазовын со арын ик «Интыысь улосвыллэн историез» нимо Шаертодонъя музей усьтћськиз. Со выллем музей Можгаын но кылдћз. 30-тћ аръёслэн пумазы – 40-тћ аръёслэн кутсконазы тодэ ваёнъя музейёс кылдо: И. Д. Пастуховлэн карка-музеез (1937-тћ арын), П. И. Чайковскийлэн корка-музеез (1940-тћ арын). 1941–45-тћ аръёсы тросэз М. пытсаськылћзы, нош юртъеръёсазы Ленинградысь но со котырысь эвакуировать карем М.-ысь экспонатъёс возиськизы. 1960–70-тћ аръёсы выльысь кылдо но вордћсько Шаертодонъя М.: Глазовын (1963-тћ арын), Воткинскын (1968-тћ арын), Ува посёлокын (1974-тћ арын), «Удмурт калык творчество» нимо Можгаын (1979-тћ арын). 1980-тћ арын Ижкарын Удмурт Элькунысь изобразительной искусствоосъя музей усьтћськиз, кудћз 1992-тћ арысен Художественной музейлэн но эстетикалы дышетонъя центрлэн филиалъёсын огазеяськемзы шуыса нимаськыны кутске. 90-тћ аръёсы Литературной музей-коркаос Алнаш черкогуртын но Ижкарын усьтћськизы: Г. Д. Красильниковлэн но Ашальчи Окилэн; Кизнер посёлокын (1990-тћ арын), Вуж Мултан черкогуртын (1995-тћ арын), Вавожын (1991-тћ арын), Каракулиноын (1991-тћ арын), Дебес черкогуртын – Сибирь трактлэн музеез (1991-тћ арын) шаертодонъя но исторической М. кылдо; Завьял ёросысь Ильинка гуртын усьтэм инбам улын М. лэсьтыны кутскемын. 1997-тћ арын Глазовысь исторической шаертодонъя М.-лэн инъетэз вылын «Иднакар» нимо Историческо-культурной музей-заповедник кылдытэмын. Кун М.-ын 250 сюрс пала пќртэм арбериос (экспонатъёс) возисько. Историлэсь но лулчеьеретлэсь синпельметъёссэ возёнын (утёнын) Ведомственной М-лэн бадњым рользы луэ. 1997-тћ арлэн кутсконаз соос 20 лыдъяськизы. Воткинскысь корт лэсьтон но Ижевскысь пыџал поттон завод музеумъёс сярысь гожтэмъёс 1829-тћ арын пумисько. Ведомственной М.-ты кинлэн луэмзыя 3 группалы люконо луэ: бадњым предприятиослэн («Ижмаш» АО, «Ижсталь» АО, автозаводлэн ведомственной музеез, «Буммаш» АО, механической заводлэн ведомственной музеез, «Аксион» АО, «Свет» заводлэн ведомственной музеез, Элеконд заводлэн ведомственной музеез но мукет), вылћ дышетсконниослэн (УдГУ, ИжГТУ, ИжГСХА), министерствоослэн но ведомствоослэн (Пуш ужъёсъя министерстволэн – (МВД), тазалык утёнъя министерстволэн, «Удмуртэнерго» ПО-лэн). Завод М-лэн историческо-технической профильзы вань, отын предприятиын поттэм продукция адњон понна люкамын. Ведомственной М.-сын 1997-тћ арлэн кутсконэз азелы 200 сюрс пќртэм арбери люкамын вал, соос пќлысь 158956-ез – археологической – УдГУ-ысь Камско-Вятской шурвислэн Вашкала историезъя музейын. 1960–80-тћ аръёсы шаертодосчиослэн, педагогъёслэн, ожгарлэн но ужлэн ветеранъёсызлэн кичолтэмзыя мер М. кылыдтэмын. 1997-тћ арлэн кутскон азезлы Удмурт Элькунын 84 мер М. лыдъясько вал, соос пќлысь 66-ез – дышетсконниосын, 11-ез – заводъёсын, 7-ез министерствоосын но ужъюртъёсын. 1980–90-тћ аръёсы тужгес но умойёсызлы М.-лы «калык музей» ним сётэмын: «Совето Союзлэн геройёсыз – асьмелэн шаерчиосмы» (Ижкарын, 73-тћ номеро школаын, кивалтћсез Р. М. Сонина – Удмурт Элькунысь культура удысысь сћё-дано ужась), «Набат памяти» (Можга карын, кивалтћсез С. П. Горошникова), Эмтодос данъя музей – Музей медицинской славы (Глазов карын, кивалтћсез А. В. Логинов), Надежда Курченколэн музеез (Глазов ёросысь Понино черкогуртын, кивалтћсез Л. В. Артемьева), В. Г. Короленко нимо музей (Кизнер ёросысь Короленко черкогуртын, кивалтћсез М. Н. Андрианова).