КИСЬТОН (от доперм. *kis'F – лить и суффикса -он) – кулэм чыжы-выжыосты буре вайыса сиён-юон. Кисьтон каро адями кулэм бере куинь уй, укмыс уй, ньыльдон уй но ар ортчыса. Куинь уйзэ, ватыны ветлэмъёсты отчаса, ватон нуналаз ортчыто, укмыс уйзэ – семья коже, 40 уяз но ар уяз вань чыжы-выжыоссэс отьыны тыршо. Вазен куд-ог гуртъёсын 40 уй кисьтоназ ассэ кулэм муртэ но отьыны шайвылэ ветлизы, кисьтонын кин ке солэсь диськутсэ дисяса, солэн нимыныз пукиз. Кисьтон жок пуме сюмык но куяськон тэркы пукто, черке пыртымтэс/чукынымтэос – гур возысь скамья вылэ пичи тусь яке тусьты пуктылизы, отчы сиён-юон люкетъёссэс тырылизы но кошкон азязы сое бакчае кисьтылизы. Адями кулэм бере 3–5 ар ортчыса, бер сизьыл яке толалтэ йыр-пыд сётон кисьтон карылизы. Воргорон аизлы вал, нылкышно мумизлы скал сётылизы: пудолэсь йыр-пыдзэ позьтыса, чыжы-выжыоссэс (кышноё-картозэ гинэ) утялтылизы. Йыр-пыд лыосты, соос вылэ векчи коньдон, басма юдэсъёс, пичи пиосмурт яке кышномурт дэрем вурыса понылизы но сюан/борысь гурен кырзаса, гурт сьоры нуыса кельтылизы. 20 даурлэн кутсконаз та йылолэз ваньмыз уте вал, пумаз – туж шерез.

Нимаз муртлы сиземъёсыз сяна, кемаласен возисько вань кулэмъёсты буре ваён тулыс но сизьыл кисьтонъёс. Соку шайвылэ ветло, вань чыжы-выжыоссылэн шайгу вылаз вуыны тыршо.

Лит.: Атаманов М.Г., Владыкин В.Е. Погребально-поминальном ритуале удмуртов//Музыка в свадебном ритуале финно-угров и соседних народов. Таллин, 1986.