КИОН (Canis lupus ; зуч сямен волк), лулосъёслэн сьось лёгетысьтызы кион динь выжыысь йол нонись пойшур. Мугорызлэн кузьдалаез 160 см-озь, силь сьорозяз жуждалаез 80 см-озь, секталаез 80 кг-озь. Гонэз пурысь чурытгес, куддыръя гордалэс. Пумиське Евразиын (самой лымшор дурзэ басьтытэк) но Уйпал Америкаын. Улэ котькытын тундраысен пустыняозь. Удмурт элькунын пумитаны луэ вань ёросъёсын, но ялан улэ чем тэлё нюко интыосын гинэ. Пиосыз будытозяз (3 – 14 кионпиосыз луэ), улэ гу караз, собере калгыса ветлэ. Пойшура уин. Чемгес кыр лулосъёсты сие, шергес – гурт пудоосты. Сиён уг шедьты ке, шойёсын котсэ тыре. Пойшуран возёслы но пудовордонлы изъян вае. Огпалмон (бешенство) висёнэз волдыны быгатэ. Удмурт элькунын К.-ты ыбылыны яра быдэс ар чоже.