КАМ ПАЛЪЁСТЫ ЭСКЕРОНЪЯ огазеяськон /дэменлык ( Общество изучения Прикамского края) (1913–1929) – Кам котырысь улосэз эскерыны шуыса 1909 арын Сарапулын земствоен музей кылдытэмын вал. Солэсь кутскем ужзэ умойгес азьланьтон сярысь сюлмаськисьёс 1913 арын нимысьтыз дэменлык кылдытизы. Дэменлыксылы кивалтисе музейлэсь директорзэ Д. В. Шабердинэз бырйизы. Та Дэменлык 1915 арын кык книга поттиз: Пермысь епархилэн журналаз историяя, археологияя но этнографияя потэм статьяослэн нимъёсынызы – «Указатель статей по истории, археологии и этнографии, помещенных в Пермских епархиальных ведомостях» (люкасез Иаков Шестаков священник), А. Тэйльсэн люкам вединьёс сярысь калык чаклан-веранъёсты – «Заметки и поверья народные и чары колдунов», 1917 арын – «Известия» нимо книга. Отын коня ке научной статьяос но архивысь документъёс сяна, печатламын Дэменлыклэн правлениезлэн 1915 ар понна отчетэз. 1925 арын потэм «Материалы к естестественно-научному изучению Прикамского края» нимо книгазы берпуметиез луиз. 1929 арын Д. В. Шабердинлэн кулэмез бере Дэменлыклэн ужез пашмиз.