ГОНДЫР (Ursus arctos ; зуч сямен медведь бурый), лулосъёслэн сьось лёгетысьтызы гондыр динь выжыысь йол нонись пойшур. Мугорызлэн кузьдалаез 2 м-озь, секталаез ог 250-300 кг мында (шер 640 кг-озь). Пумиське тэлё интыосын но гурезь тэльёсын Евразиын но Уйпал Америкаын. Удмурт шаерын, шер тэлё ёросъёсын (Каракулино но Алнаш ёросъёслэн тужгес но лымшор дуръёсазы) сяна, котькытын но пумитаны луэ. Лыдзыя Г.-ёс тросгес кунлэн уйпалаз, кытын трос тэльёс (Балезино, Кез, Глаз ёросъёсын). Улэ шыпыт нюлэсъёсын, яратэ нюко туж чем тэльёсты, уг кышка матысь возёс улосвылъёслэсь но. Сие котьмае но, тэль емышъёсын кутскыса таза зок гижыё лулосъёсозь (кылсярысь, койыкъёсты). Толалтэлы пограм писпуос улэ кар лэсьтэ но толэз колыса ортчытэ (шуркынмонысен оштолэзьлэн шорозяз). Гу карзэ лэсьтэ нюлэслэн шыпыт, адямиос ветлонтэм интыаз. Мойы но висись Г.-ёс толалтэлы кой люканы уг быгато, соин колыны уг выдо. Соос чемысь кесяло койыкъёсты, гурт пудо-животъёсты, адямилы но кышкытлык ваё. Пиосыз синтэм, 1 – 3 кузя луо (шер 4 – 5), толлэн шораз вордисько. Лицензияя гинэ кутылыны яра. Быгатэ изъян вайыны пойшуран но гурт возёсъёслы (пойшуран лулосъёсты но гурт пудо-животъёсты сие, бусыосысь кизем сезьыез арам каре, муш умортоосты кеся).