Емышо культураос

(њуч - овощные культуры), сыџе будосъёс, кудъёссэ емышъёсыз понна мертто. Удм. шаерын соос ог 120 пала. Продукт. органъёссыя соосты люко куаро (кубиста, салат, шпинат, укроп, сельдерей куароез но модосоез, куаро петрушка, ревень но кузькылак); емышо (томат, баклажан, перец, кияр - огреч, кабачок, патиссон, арбуз, дыня, тыква, кќжы, фасоль, бобы); выжыемышо (кешыр - морковь яке џуж кушман, выжыё сельдерей, выжыё петрушка, пастернак, горд кушман, каляга, сяртчы, редис, курыт кушман); сугон семействое пырись (сяртчы сугон, чеснок, порей сугон, батун сугон, шнитт сугон). Нимаз группае пыро курыт-кузял макеос, пряной шќмоос (анис, кориандр, кресс-салат, тмин, мята, майоран, эстрагон но мук.). Емышъёсын вань витаминъёс но пит. вещ-оос: белок, кќйёс но углеводъёс. Вузы трос луэмен (70-95 %) соослэн калориоссы ќжыт. Емышъёслэн ческытсы но кельшись зынзы валэктћське таџе веществоослэн пќртэм сямен радъяськеменызы: сахарлэн, органич. чырсъёслэн, ароматич. но минер. в-воослэн. Укропын, петрушкаын, чеснокын, сугонын, кушманын но киреньын трос фитонцидъёсыз. Асьме республикаын тросгес мертто но кизё таџеоссэ: кубиста, горд кушман, кешыр, вож сиёнъёс, парникъёсын кияр но помидор. Будэто соосты огъя но личной хозяйствоосын. 1997 арын ваньзэ 167,9 сюрс т емышъёс басьтэмын.
Лит.: Богатырева Н. И. Овощи. Ижевск, 1979.