«БОЛЯК» – удмурт культураез эскеронъя огазеяськон, нырысетиез удм.научной организация. Кылдытэмын Москваын 1922 арлэн пумаз К. Герд , проф. В.П. Налимов , Я.В. Прохоров кичолтэмъя. Наукаосъя Академилэн шаертодонъя шор кивалтэтаз пыриз. «Боляклэн» люкетъёсыз кылдылизы Казаньын, Глазовын, собере Ижын, Можгалан, Вяткаын, Пермьын но Дэбесын. Пуктэм ужпумъёсыз: улон-вылонэз, историез, экономикаез, культураез, общественной движениез эскерон но сое паськытатон; удмуртъёс сярысь тодонъёс люкан но книгаос печатлан. Боляк, дышетскем удмуртъёсты огазеям сяна, удмуртлыкен тунсыкъяськись но та удысын ужась мукет выжыысь адямиосты но котыраз люказ. Москваын Боляклэн 48 мурт ёзчиез вал, Казаньын – 30, данакез соос – удмурт студентъёс, дышетисьёс. Огазеяськонлэн кылъя но лит-рая, экономикая, гурт хозяйствоя, кылысь кылэ берыктонъя но лекциос лыдзонъя ёзъёсыз вал. Эскеронъёсынызы тодматыса мыло-кыдо вераськылизы тодосчиос: К.П. Герд, И.Д. Дмитриев_Кельда , М.М. Аммосов , В.П. Налимов. Куд-ог ужъёссы печатламын «Вотяки» нимо стьяосын бичетын (М., 1926) но мукет изданиосын. Отчы пыризы К. Гердлэн, М. Ильинлэн , И. Михеевлэн , М. Прокопьевлэн гожъямъёссы . 20-ти аръёслэн пумазы национальной культураен тунсыкъяькисьёсты буржуазной национализмен пыкылонъёс шодскыны кутскизы. 1928 арын «Боляк» быдтэмын вал.