БАЛЯН (Felis lyux ; зуч сямен рысь), лулосъёслэн сьось лёгетысьтызы кочыш динь выжыысь йол нонись пойшур. Мугорызлэн кузьдалаез 110 см-озь, секталаез 30 кг-озь. Быжыз туж вакчи, мырк. Пель йылъёсаз кузь сьод гонъёсыз вань. Гонэз небыт, пуштрес, чужалэс-пурысь, гордалэс-пурысь, пеймыт пусъёсын. Пумиське Европалэн но Уйпал Америкалэн тэльёсаз, Кавказ, Покчи но Шор Азия, Тибет гурезьёслэн тэльёсаз. Удмурт элькунын ожыт пумиське. Улэ тэльын, пойшура огназ жомо-югдо дыръя но вазь чукна. Мумы Б.-лэн арлы одиг пол 2 – 3 (шергес 4 – 5) кочышпиез вордске. Лудкечъёсты, йырйись лулосъёсты, тылобурдоосты сие. Дунне вузпорын (рынокъёсын) куэз туж дуно лыдъяске. Пойшуран онерлы изъян вае, трос пойшуръёсты виеменыз.