АНАНЬИНО ЛУЛЧЕБЕРЕТ (КУЛЬТУРА) , корт даурысь архиологи культура, волмемын вал 8 – 3-ти дауръёсы асьме эралэсь азьло, Кама, Вятка, Ветлуга, Вымь, Печора шуръёслэн котыразы. Кылдытизы сое вашкала финно-перм калыкъёс – удмуртъёслэн, коми-пермякъёслэн но коми-зырянъёслэн чыжы-выжыоссы. Нимамын Ананьино гуртъя (Елабуга дорын), кытын 1858-ти аре П.В. Алабин вашкала шайвылэз копаса шедьтиз. Удмуртиын А.к. герзаськем трос гучинъёс но шайвылъёс тодмо луо. Эскеремын ини Зуй (218 ватос), Каракулино (4 шай), выли Мошкар шайёс. Ваньмыз некропольёс вырйылтэмесь (бескурганные). Ананьино шайвылъя чаклано ке, шай вылэ из стеллаос пуктылизы, кытын бырем ожчиос суредамын вал. Адямиос оген-оген ватылэмын, но куд-ог интыосын одиг гуэ трос мурт понэмын. Шойёс тыбыр вылазы кыллё, пыдъёсынызы шурлань. Воргоронъёслэн шайёссы узыресьгес, нылкышноослэн сярысь. Воргорон шайгуосын пумисько копьёослэн но пукыч ньолъёслэн наконечникъёссы, ож тиръёс-секиръёс, культъёс, кускерттонъёс ыргон накладкаосын но привескаосын, чырты гривнаос но суйпосъёс (браслетъёс). Нылкышно шайгуосын – ыргон бляшкаос, гривнаос, суйпосъёс, зундэсъёс, куддыръя весьёс, шилья. Веньёс. Шайгуэ пуктэмын горд сюй горшокъёсын стен, со пал дунне мынон понна, нылкышноослы кунян-скал силь, воргоронъёслы – вал силь. Зуй могильникын 150-лэсь ятыр арбери шедьтэмын, кудъёсыз куинь технологи йылолъёсъя лэсьтэмын: чылкыт ыргонлэсь, сурмьяно-мышьяковских сплавов и туй бронзалэсь. Корт дурон йылолъёс трос ласянь Уйпал Кавказысь, Скифиысь адзем каремын, нош 6-5 дауре асьме эралэсь азьло – Казахстанлэсь но Шор Азилэсь. 5-4-ти дауръёс вискын (асьме эралэсь азьло) ужан но ожмаськон арбериос лэсьтон удысын корт пумен ворме ыргонэз. А.к. вакытэ тодмо луо каръёс, кудъёсыз сюй вырйёсын но гопъёсын котыртэмын (Зуево-Ключевсое 1, Выли Мошкар, Каменный Лог но мкт.), кудъёсыз котыртымтэ (Барановские, Ныргында, Быргында). 6-ти дауре (асьме эралэсь азьло) лымшор кочевникъёслэсь утиськон понна, каръёс нырысь ик Камалэн уллапалаз, собере быдэс Кам шаеръёсы волмизы. Каракулино ёросын гинэ соос 26, Сарапул ёросын – 15. Тужгес но синадзымон луэ Зуевско-Ключевское 1 гучин, кудиз 2 сюй вырен но гуэн котыртэмын. Бадзымез вырлэн пасьталаез 10 м но жуждалаез 3,5 м. Со азьын 2 м мурдала гу копамын (пасьталаез 4,2 м), нош 10 м ортчыса, жутэмын на эшшо сюй выр (вал). Котькуд сюй вырйылын одно ик бревенчатый частокол лэсьтэмын луэ. Оглом лыдъяно ке, тужмонъъёслы люкетонлэн жуждалаез гуэн, вырен нопумит коръёслэсь частоколэн 8 м пала луэ. Пасьталаез 30 сюрс м2, урамъёсы коня ке радэн ньыль сэрего пу коркаос жутэмын (60 – 72 м2), пырон осъёсыз – чукшор ласянь яке лымшорен-чукшорен вискын, пырем бере паллян палан колан зусъёс, улоннилэн шораз ик – тылскон инты, чемысь горд сюй инъет вылын. Куддыръя тылскон инты ищъёсын котыртэмын.