Айшон (общеперм. оз–азь, *оs–люкон, люкиськон) – картлы бызем нылкышнолэн вашкала изьыез. Кызьпу туйлэсь лэсьтыса, сое дэраен кыскылизы но векчи коньдонэн, весьёсын, гырпиньёсын чеберъязы. А . зучъёслэн кокошник, поръёслэн шурка, мордваослэн панчо, казахъёслэн саукеле нимо изьыоссылы укшась маке. Жуждалаез портэм улосъёсын 20–40 см луылиз. А. сярысь нырысьсэ (1788 а.) зечос гожтыса академик П. С. Паллас кельтиз. Нылкышнолэн йыраз айшонэз нырысьсэ понылизы сюан дыръя, вылькенэз картэзлэн корказ ваемзы бере, кен изьыян карыкузы. Со дырысен нылпи ваемысь дугдытозяз калык азе кышномурт йыраз айшонтэк оз поталля. А. вылэ сюлык /сюлык-кышет поно вал. 18-19 дауръёсы айшонэз Вятка губерниысь Сарапул, Елабуга, Малмыж уездъёсын нулло шуыса гожъяллязы. 19 даурлэн пумысеныз сое пумен нуллэмысь дугдыны одъязы, 20 дауре воксё куштиськизы. Со музей экспонатлы пормиз. Адзыны луылиз на театрлэн вуж улонэз возьматись спектакльёсысьтыз. Туала дыре куд-ог фольклор ансамбльёс возьматыло.

Лит.: Паллас П. С. Путешествие по разным провинциям Российской империи. Ч. 3. СПб, 1788; Белицер. В. Н. Народная одежда удмуртов. М., 1951; Удмурты: Историко-этнографические очерки. Ижевск, 1993.