Айшет (общеперм.*оз–азь/передняя часть и *кис–вурыны/обшить) – удмурт дисьлэн оглюкетэз. Вазен пиосъёс но нуллизы. Пиосмурт айшетэз тодьы дэралэсь, гадьыныз чош быдэсак вандыса, вурылизы. Нылкышно айшет интыен-интыен огкадь ой вал: уйпалъёслэн гадьтэк, лымшорпалъёс гурулозязы гадё каро, шор ёросъёсын вакчи/лапег гадё нуллизы. Нылкышно айшет гадез, нимаз вандыса, улиез борды вуро. Вазен айшет адямилэсь азьзэ утисен лыдъяськем, лэся, борысь тае оз чаклалэ ни, сое дэрем курмемлэсь азязы нуллизы. Юондыре айшет дисез чеберман понна керттылизы. Тодьы дэремлы тодьыен-гордэн куэм пужыё айшет дасяллязы; алача дэремлы –кечато, бичам/жуткам пужыосын чеберъям айшет. Борысьгес айшет созызэс пужыё басмаен, лентаен, тасмаен яке чильтэрен/чилепен чеберъяллязы. Туала арын лымшорпал удмурт нылкышноос пужыятэм тодьы яке сьод айшет вурыло. Материалзэ магазинысь басьто.

Лит .: Белицер. В. Н. Народная одежда удмуртов. М., 1951; Удмурты: Историко-этнографические очерки. Ижевск, 1993.

Л. С. Христолюбова